Orlofshús (byggt eftir árið 2022) í Hálöndum er á einni hæð, 116m2² að stærð. Burðarvirki er úr gegnheilu timbri (CLT). Flestir innveggir eru timbur áferð. Gólf eru flísalögð. Að utan eru húsið klætt með sléttri álklæðningu (Alucobond). Þak er einhalla. Í húsinu eru þrjú svefnherbergi. Í alrými er góður eldhúskrókur, borð- og setustofa. Tvær snyrtingar með sturtu eru í hverju húsi. Veggir baðherbergja eru plötuklæddir með Fibo-Trespo plötum. Í eldhúsinnréttingu er  bakarofn og keramik helluborð með innbyggðri viftu.

Varmaskiptir er á neysluvatni. Loftræsisamstæða með varmaendurvinnslu er í húsinu, staðsett í útigeymslu. Gluggar og hurðir eru ýmist ál-timbur, timbur eða álkerfi. Stétt og verönd eru tengd lokuðu snjóbræðslukerfi.  Við verönd er steinsteypt skjólgirðing. Á verönd er tengdur heitur pottur með loki. Stór geymsla með sérinngangi er í húsinu en þar geta gestir t.d. borið á skíði sín og geymt og þurrkað ýmsan viðlegubúnað.